حسنية وفتحية بقلم عارف البديوي

حسنية وفتحية
جارتين الله يجيرنا منهم هما الاتنين حسنية طلعت البلكونة من الصبحية ونادت جارتها فتحية صباح الخير يافتحية صباحك عسل ياحسنية ياعنيا بصي يافتحية انا مستعجلة شوية حبيت اصبح عليك اصلي عايزة اصحي العيال يروحوا المدرسة وافيق ابوحمدي يروح شغله وانا زيك ياختي سمعتي يافتحية طول الليل والخناق شغال بين عسلية وجوزها ماعرفناش ننام من أصواتهم العالية وهات ياخبط وهات ياضرب هما الاتنين اه ياحسنية ديما يتخانقوا باستمرار ستي ماخصناش هما أحرار فتحية عرفتي ان جارتنا حمدية بتجهز بنتها المفعوصة عايزه تجوزها ولسه البيضه مافقستش عنها عريسها متريش مليونير يااختي
ماعلينا خلينا نسيب الناس بحالهم اصلي ماحبش اجيب بسيرة الناس حسنية ابن الجيران فضول بيشرب سكاير ويروح يسهر مع شلة عاطلة في القهاوي ايوه باختي اصلهم أهله ماعرفوش يربوه مين حايربيه امه مش فاضيالوا كل يوم عندها استقبال مشى زينا ملتفتين لعيالنا وبيتنا وابوه عينه زايغه على البنات يارب استر يارب والله مابحبش النميمة
اسكتي اسكتي ياحسنية جارتنا بهية جوزها طلقها بالتلاته وهي لمت هدومها وراحت لاهلها ربنا يجيرنا من حكم الرجالة اصلهم ماحدش يقدر عليهم بس انا وانتي مريحين ازواجنا عاالاخر ابوحمدي يصرخ من جوا الشقة حسنية ياحسنية ربنا يخرب بيتك الساعة بقت تسعة وانا لازم اكون في الوظيفة والعيال لسه نايمين ماراحوش المدرسة ياخبر يافتحية انا نسيت العيال وابو العيال ياه ياحسنية وانا برضه نسيت اللحمة عالنار اصلها شاطت واتحرفت دلوقتي
والله اصلنا قليلين  البخت ياحبيبتي مانحبش نرغي كتير وكلامنا قليل وتكره النميمة والنمامين بس ازواجنا صبرهم قليل باي باي بقه ياعنيا ماتنيش تكلميني تاني بعد شوية اصلوا فيه كلام كتير ماقلناهوش حاضر ياحببتي
        عارف البديوي