خلاص بقلم أنور محجوب

خلاص راح اللي راح
ناس ماتت وناس عاشت
وناس بكت عليها النار
وناس رفعت إيديها للقهار
بتدعي بالرحمة لولادنا
وناس فرحانه وسيلفي تتصور
مع القطر اللي قتل غلابة مصر
وناس نايمة ومش دريانه
بأوجاعنا . وتصحي العصر
ومسئول يفتي. ومسئول يبكي
وغيره يحكي عملنا اللازم
صرفنالهم قال ايه. فلوس تعويض
ياناس حرام عليكم. وكفاية بقي تعريض
يوم واتنين.. خلاص القطر هيمشي
وترجع تاني فرحتنا وضحكتنا
وننسي الإبن اللي اتيتم بسبب إهمال
وننسي الأم اللي راح منها ضي العين
عشان سواق ماعنده ضمير
ويبقى الألم بس لأسرة شاب مات محروق
ويسكن الحزن بيت راجل مات مخنوق
ويطلع طير الصباح ينده .حراااام
كفاية جروح ..ياناس فوقوا. ياناس اصحوا  ..بقى من النوم.!!
أنور محجوب